FNTI THONNÓNHTONS KANENHRÓN:NI – ATHONKARYÀ:KSERA WATE'SHENNAYENTÁ:'ON

FNTI Thonnónhtons Kanenhrón:ni shakotiya'tí:saks onhkarè:shon ronatonnhárha ne aorihwà:ke ne kaweyenhstà:tshera ne káti ahotiyaneráhsten ne Onkwehón:we táhnon ne raotinakerahsera'shón:'a.

FNTI ratinyén:te: Tayakwataterihónnyen nahò:ten yonkwarihwayenterhá:'on, Onkwehón:we raonateryen'tarà:tshera nityawé:non, ne káti ayoyaneráhsten tsi nihoti'nikonhra'shátste ne ronteweyénhstha táhnon raotinakerahsera'shón:'a.

Ohén:ton teyakwaká:nere akwatahónhsatate tóka':

Kanakeráhsera se'nikòn:rare né:ne senorónhstha Onkwehón:we nihotirihò:ten táhnon raonateryen'tarà:tshera;

Sahská:neks ahsheya'takéhnha taesewayé:na aesewayó'ten ne FNTI aokoráhsera;

Sarihwayenterhá:'on ne kaweyenhstà:tshera, tekariho'kwáhtha táhnon tsi tesewatattharén:ni, ohwísta táhnon/tóka'ni kakoráhsera; táhnon íhse nón:we ne 18 nitisá:yen.

Wa'kwahón:karon ahskwahyatonhseranyéhten nè:ne wathró:ri nahò:ten senyén:te, nahò:ten satyo'tenhserayenterhá:'on, táhnon áhsen nihá:ti ahonthsén:naren nè:ne yesayo'tenhserayenté:ri:

FNTI Board of Directors

Attention: Board Secretary
3 Old York Road
Tyendinaga Mohawk Territory, Ontario K0K 1X0

Email: (christine@fnti.net)

THONNÓNHTONS KANENHRÓN:NI

Ralph C. Brant, Raterihwahtentyà:tha – Ralph roterihwayenteré:'on ne tetsyá:ron ohwísta táhnon kayanerénhsera. Rahá:wi ne CMA kahyatonhseranó:ron ne ò:ni ne LLB táhnon rate'nikonhrayé:rats tsi tehshakowennáhkwa tetsyarónhkwen tsi tehatirihwakéhnhas. Ralph é:so tsi roterihwayenterhá:'on tsi royó'tehkwe ne tetsyá:ron kakoráhsera raoná:wen táhnon ne onkwe'shón:'a raoná:wen. Rotoríhshen tsi royó'te ne kakoráhsera 2009 shiyohserò:ten.

Jennifer Neepin, Kanenhrì:ne kanhà:tshera – Jennifer né:ne Kenhte'kehró:non, oyé:ri niyohserá:ke nikarì:wes yenenhrì:ne, nek tsi sénha karì:wes ó:nen yakotyà:tare táhnon ye'nikòn:rare ne FNTI – ako'nisténha Joan Brant, yeya'tá:rahkwe ne FNTI thonanityohkwatyerénhten táhnon kén:'en wa'onthonkárya'ke tsi nikarì:wes yonteweyénhsthahkwe ne Fleming College. Tayontáhsawen tsi niyakonnhehs kaweyenhstà:tshera yakaon'wéskwani shiyeksá:'a atekhwahráhne ayontahónhsatate ne tehotihtharáhkwen tsi na'teyotonhwentsyóhon ahonate'shennayén:take ahatiweyentéhta'ne kanakerahserá:kon táhnon tsi nenyoyáneren'ne akwé:kon nahò:ten karihonnyén:ni taóntyehste Onkwehonwehnéha ateryen'tarà:tshera. Né:'e eh aorihwà:ke nón:wa tehotihtharáhkwa ne tehniyáhse ronwatiyén:'a.

Jennifer niya'té:kon yakoyo'tenhserayentá:'on akonakerahserá:kon, Tyonnónhtons ne Ohwísta táhnon Tsi Yehyatónhkwa, táhnon 'corporate' niya'tekentyóhkwake, né:ne tsi yehwistayentáhkwa kentyohkwarónnyon. Nón:wa yakoyo'ténhseronte ne Rodgers Investment Consulting nón:we, eh yeyehstányons akoteryen'tarà:tshera táhnon Onkwehón:we tsi ní:yoht tsi tehatiká:nere. Jennifer yéhawe ne Bachelor of Commerce (Honours) kahyatonhseranó:ron ne Manitoba Yonteweyenhstahkwa'kó:wa nityakohyatonhserayentá:'on táhnon CAFM (Certified Aboriginal Finance Manager) né:ne AFOA Koráhne (Aboriginal Financial Officers Association of Canada konwá:yatskwe) nityakohyatonhserayentá:'on.

Winston R. Brant, Teharistò:raraks/Rahwistanónhnha - Nón:wa rotoríhshen, Winston 25 niyohserá:ke nihoterihwayenterhá:'on tsi Koráhne táhnon provincial kakoráhsera aoya'torehtà:tshera royo'tén:'on. Kenhte'kehró:non nihaya'tò:ten.

Kate Brant, Tyonnónhtons - Kate é:so niyohserá:ke yakotyenawáhston teyeriho'kwáhtha táhnon yehretsyarónnyons ne Onkwehón:we kaweyenhstà:tshera táhnon tsi nihotirihò:ten. Tyakoyerí:ton tsi wa'ontéweyenhste ne FNTI aó:wen Indigenous Community Health Approaches orihwa'shón:'a, nón:wa yonthonkárya'ks tsi yakoyó'te tsi yontate'nikonhrá:wis. Kate yakoyo'ténhseronte ne Indigenous Community Development Worker né:ne Napanee Area Community Health Centre nón:we né:ne yerihwà:reks taóntyehste ne Onkwehón:we nihotirihò:ten tsi tehshakotitsyèn:tha ne tsi tkanatowá:nens. Kate ne ò:ni yontyà:tare ne Kingston-area Grandmothers Council, yontyà:tare ne Tyendinaga Health Advisory Committee táhnon ne Tyendinaga Education Committee. Yeweyén:te niya'té:kon ayakón:ni táhnon yekhón:nis né:ne yakaon'wéskwani tayé:yehste ne Onkwehón:we raotikhwa'ón:we ne ón:wa wenhniseratényons tsi ratikhwakwatákwas.

Donna Loft,Tyonnónhtons - Donna ne Kenhte'kehró:non táhnon yéhawe ne Health Program Advisor kayo'ténhsera né:ne Chiefs of Ontario nón;we, né:ne wa'tyakotonhwéntsyohse kwah tokén:'en ayako'nikonhrayentá:'onke niya'teyorì:wake ne Onkwehón:we raotirihwà:ke ne Tsi Kanyatarí:yo táhnon ohwentsyakwé:kon ne Koráhne. Wá:'ontste ki ateryen'tarà:tshera ne Donna tehotirihwayenawà:kon tsi wahonhténtya'te ne Home & Community Care tsi ronteweyénhstha ne Onkwehonwehnéhshon Tsi Kanyatarí:yo. Ne ò:ni tsi yakoyo'tén:'on ne Health Services, Donna é:so tsi yakoterihwayenterhá:'on tsi yakoyó'te ne Child Welfare Programshón:'a Onkwehonwehnéhshon ne Ohén:ton Í:yete ne Health and Social Services, wahatirihwahserón:ni táhnon wahatikwatá:ko ne DVD yakoweyenhstén:ni ne Case Management táhnon Tehotikwenhén:tons tsi ní:yoht shakotiya'takéhnhas né:ne yorihowá:nen ne thotiyon'onhátye raotirihwà:ke Onkwehonwehnéhshon táhnon tsi ratikwatákwas ne Chronic Disease Management Summit rotiyo'tényon.

Ne enwatahsónteren ne nahò:ten ó:nen yá:ken, Donna yakoterihwayenterhá:'on ne Social táhnon Kaya'torehtà:tshera yotirihwa'kéhshon wa'ontaterihón:ten ne Tsi Kanyatarí:yo Parole Board, wa'akoyén:ta'ne ne “Foundation for Democracy Award” né:ne Taiwan Kakoráhsera nityawé:non táhnon tehonwatiwennáhkwa ne Office of the Correctional Investigator né:ne Federal Correctional Services System nonwéshon.

Doug Green, Thanónhtons

Kenhte'kehró:non nihaya'tò:ten ne Doug.

Rotohétston tsi wahatéweyenhste ne Loyalist Yonteweyenhstáhkwa, wahohyatonhserayén:ta'ne ne Electrical Engineering Technician. Tsi Kanyatarí:yo Hydro royó'tehkwe ne 31 niyohserá:ke ne Power Generation né:ne Thermal and Nuclear Generating Stations and Transmission Lines Projects. Wahoyó'ten ne Resident Engineering táhnon tsi roterihwayenterhá:'on ne royó'tehkwe ne Auditor in Quality Assurance táhnon tsi raterihwahtentyà:thahkwe né:ne Continuous Quality Improvement and Self-Assessment aorihwà:ke. Doug wahatoríhshen tsi royó'te ne Tsi Kanyatarí:yo Hydro ne 2005 shiyohserò:ten.

Pam Detlor, Tyonnónhtons

Pam ne Kenhte'kehró:non niyeya'tò:ten táhnon yakoyo'tenhserón:tahkwe ne Deputy Church Warden né:ne Anglican Parish of Tyendinaga nón:we. Pam yakoyo'tén:'en ne FNTI Thonnónhtons Kanenhrón:ni ne teyohserá:ke nikarì:wes.